ಪ್ರೀತಿಯ ಬಂಧುಗಳೆ,

ದೀವ ಜನಾಂಗದ ಜನಜೀವನ, ಕಲೆ ಮತ್ತು ಸಂಸ್ಕೃತಿಯ ಅನಾವರಣದ ಸಲುವಾಗಿ ಸಿರ್ಮಿಸಲಾಗುತ್ತಿರುವ  ವೆಬ್ ಸೈಟ್  www.deevaru.com  ಗೆ ನಿಮಗೆಲ್ಲ ಸ್ವಾಗತ. 

           ಶಿವಮೊಗ್ಗ ಜಿಲ್ಲೆಯ ಸಾಗರ, ಸೊರಬ,ಶಿಕಾರಿಪುರ, ಹೊಸನಗರ ಹಾಗೂ ತೀರ್ಥಹಳ್ಳಿ ತಾಲ್ಲೂಕುಗಳಲ್ಲಿ ಉತ್ತರಕನ್ನಡ ಜಿಲ್ಲಯ ಶಿರಸಿ, ಸಿದ್ದಾಪುರ ತಾಲ್ಲೂಕುಗಳಲ್ಲಿ, ಚಿಕ್ಕಮಗಳೂರು ಜಿಲ್ಲೆಯ ಕೆಲವು ತಾಲ್ಲೂಕುಗಳಲ್ಲಿ ವಾಸವಾಗಿರುವ ಒಂದು ವೈಶಿಷ್ಟಪೂರ್ಣ ಜನಾಂಗ “ದೀವರು”. ಈ ಜನಾಂಗದವರು ಹೆಚ್ಚಾಗಿ ಸಹ್ಯಾದ್ರಿ ಬೆಟ್ಟಗಳ ತಪ್ಪಲುಗಳ ಅರಣ್ಯ ಪ್ರದೇಶಗಳಲ್ಲಿ ವಾಸವಾಗಿದ್ದಾರೆ. ಇವರಿಗೆ ಹಳೆಪೈಕ, ದೀವರು, ನಾಮಧಾರಿಗಳು, ನಾಮಧಾರಿ ವಿಷ್ಣುಭಕ್ತರು, ಹಾಲಕ್ಷತ್ರಿಯ, ಕುಮಾರಕ್ಷತ್ರಿಯ ಮುಂತಾದ ಹೆಸರುಗಳಿಂದ ಕರೆಯುತ್ತಾರೆ. ದೀವರಲ್ಲಿ ಬಿಯಿನೆ(ಬಗಿನೆ) ದೀವರು ಅಥವಾ ಕಾನುದೀವರು ಮತ್ತು ತೆಂಗಿನ ದೀವರು ಎಂದು ಎರಡು ಪಂಗಡಗಳಿವೆ. ಕಾನುದೀವರು ಶಿವಮೊಗ್ಗ ಜಿಲ್ಲೆಯ ಸಾಗರ, ಸೊರಬ ತಾಲ್ಲೂಕುಗಳಲ್ಲಿ ಹೇರಳವಾಗಿ ಶಿಕಾರಿಪುರ, ಹೊಸನಗರ, ತೀರ್ಥಹಳ್ಳಿ ಮತ್ತು ಚಿಕ್ಕಮಗಳೂರು ಜಿಲ್ಲೆಯ ಕೆಲವು ಭಾಗಗಳಲ್ಲಿ ವಿರಳವಾಗಿ ಉತ್ತರಕನ್ನಡ ಜಿಲ್ಲೆಯ ಶಿರಸಿ, ಸಿದ್ದಾಪುರ ತಾಲ್ಲೂಕುಗಳಲ್ಲಿ ಅಲ್ಲಲ್ಲಿ ಚದುರಿಕೊಂಡಂತೆ ಇದ್ದಾರೆ. ತೆಂಗಿನದೀವರು ಉತ್ತರಕನ್ನಡ ಜಿಲ್ಲೆಯ ಹೊನ್ನಾವರ, ಕುಮಟಾ, ಅಂಕೋಲ ತಾಲ್ಲೂಕುಗಳಲ್ಲಿ ಹೆಚ್ಚಾಗಿ ವಾಸವಾಗಿದ್ದಾರೆ, ದಕ್ಷಿಣಕನ್ನಡ ಜಿಲ್ಲೆಯ ಬಿಲ್ಲವರು, ಕೇರಳದ ತಿಯ್ಯಾನರು, ಶಿವಮೊಗ್ಗ ಮತ್ತು ಉತ್ತರಕನ್ನಡ ಜಿಲ್ಲೆಯ ಸಿದ್ದಾಪುರ, ಶಿರಸಿ ತಾಲ್ಲೂಕಿನ ದೀವರು ಮೂಲತ: ಒಂದೇ ಬುಡಕಟ್ಟಿಗೆ ಸೇರಿದವರು. ಈ ಎಲ್ಲಾ ಗುಂಪುಗಳು ಹಳೇಪೈಕದವರು. ಈ ಗುಂಪುಗಳ ಮೂಲ ಹೆಸರು ಹಳೇಪೈಕ ಅಥವಾ ಹಳೇಪಾಯಕ ಎಂದು. ಹಳೆ ಎಂದರೆ ಪುರಾತನ ಹಳೆಯ “ಪಾಯಕ” ಎಂದರೆ ಸೈನಿಕ, ಪದಾತಿದಳ, ಕಾಲಾಳು ಎಂದರ್ಥ. 

    ಇವರು ವಿಜಯನಗರ ಮತ್ತು ಕೆಳದಿ ಸಾಮ್ರಾಜ್ಯಗಳಲ್ಲಿ ಸೈನಿಕರಾಗಿ ಉದ್ಯೋಗ ಮಾಡುತ್ತಿದ್ದರು ಎಂದು ಹೇಳಲಾಗಿದೆ. ಕರಾವಳಿ ಭಾಷೆ ಮಾತನಾಡು ಹಳೆಪೈಕರು, ತುಳು ಮಾತನಾಡುವು ಬಿಲ್ಲವರು ಕೂಡ ತಮ್ಮನ್ನು ಹಳೆಪೈಕರೆಂದು ಕರೆದುಕೊಳ್ಳುತ್ತಾರೆ ಎಂದು ತರ್ಸನ್ ಮತ್ತು ಕೆ.ರಂಗಾಚಾರಿಯವರು ತಮ್ಮ “Caste and Tribe of Southern India” ಎಂಬ ಗ್ರಂಥದಲ್ಲಿ ಉಲ್ಲೇಖಿಸಿದ್ದಾರೆ. ಹಳೆಪೈಕರ ಗುರುವಾದ ಮೈಸೂರು ಪ್ರಾಂತ್ಯದ ಸಾಗರ ಲೋಕಾಚಾರ್ಯ  ಇವರ ಮೂಲದ ಬಗ್ಗೆ ಒಂದು ಕತೆಯನ್ನು ಹೇಳುತ್ತಾರೆ.

 ಮುಂದೆ ಓದಿ